محمد فتحى يكشف كذب محامى خلية الماريوت

هل باسم يوسف شتم السيسي زي ما قال عليه خالد ابو بكر في تويتتين تلاتة حب بيهم ياخد موقف ويقول انا رديت عليه وقلتله عيب ؟؟ 

(معلوماتي) لأ ..

باسم ماشتمش السيسي ..

طب هل تلفظ بلفظ كده والا كده ..

آه .. ما استبعدش .. واحد قابل واحد صاحبه (عماد الدين حسين) وقال له : والنبي يا أستاذ توصلوا صوتنا للإعلام ال(…..) وتقولولهم ان بعد ما السيسي ركب العجلة لغولنا سباق عجل في العين السخنة.. 

خالد ابو بكر رد وقال له : عيب الكلام ده في أطفال وستات وبلا بلا بلا بلاااا

فرد باسم : أنا ماوجهتلكش كلام ولا كلمتك أصلاً ..

وراح مكمل بأشياء أخرى لم يكن بينها أي شتيمة للسيسي ..

………….

انتهى الموقف ..

عندي أكتر من ملاحظة ..

الأولى : تخيل لو حد معدي بالصدفة وشاف المشهد ده وراح حاكي المشهد ..

هل هيقول ان باسم شتم السيسي ؟؟

والتانية : لو تخيلنا نفس الحد اللي معدي ده ، جه وحكالنا الموقف زي ما انا حكيته كده .. كان هيبقى رأيك إيه ؟؟

والتالتة : لو تخيلنا حد تاني خالص .. معدي ، وشاف باسم غلط في السيسي ، وراح قايل (انما المحامي اللي اسمه خالد ابو بكر الشهادة لله ما سكتش) .. ده يبقى أفضل، والا ان خالد ابو بكر يروح جاري على تويتر قبل ما يركب الطيارة ، ويقول باسم شتم السيسي وانا رديت عليه وقلتله عيب (إيه الموقف أو النقط اللي انت عايز تاخدها ، وعايز تاخدها عند مين )

………….

كمالة الموقف اللي ماحدش يعرفها غير موظفين في مطار القاهرة ..

حصلت لما باسم اللي كان راكب نفس الطيارة رجع مع خالد ابو بكر مصر 

وشاف التويتات بتاعته

فراح نادهله ف وسط المطار ، وقال له لما تيجي تبلغ عني بلغ باللي حصل مش تقول شتم السيسي .. انا قلت انكم اعلام (….) انت خدتها على نفسك دي حاجة تانية ..

قول ده للي مشغلينك

…………….

بالنسبة لي : 

– أنا رافض الشتيمة بشكل عام 

– رافض شتيمة رئيس البلد دي في أي مكان ( كنت كده أيام مبارك وكده أيام مرسي عشان الناس الزياطة) ، وشايف ان لو عندي مشكلة مع رئيس بلدي بحلها جوة بلدي ، أو انتقده جوة بلدي (قول عليا دقة قديمة لكن الأخلاق اللي اتربيت عليها كده ) 

– اللي عمله خالد ابو بكر عيب .. يفكرك باللي بيحصل لما حد يفتن عليك للمستر في حصة الأشطة عشان المستر يعبطك .. صحيح المستر ممكن يعبطك، لكن بتفضل في نظر باقي الفل عصفورة ، فمابالك لو كان الكلام اللي بتقوله مش دقيق أصلاً ..

– الكلام الخاص في القعدات الخاصة مش مكانه تويتر ، وعيب اني ابقى واقف مع واحد صاحبي في وجود واحد صاحبه واتفك بكلمتين الاقي صاحبه منزلهم على تويتر

– زي ما قلتلك .. لو صحت الشتيمة .. عيب .. لكن العيب الأكبر في اللي نقل الشتيمة، وعندنا ف مصر مثل بيقول (ماشتمك الا اللي بلغك)

وفي النهاية فإن الرواية لن تستقيم إلى بشهادة الأستاذ عماد الدين حسين .. ممكن يا أستاذ عماد ؟؟