الحملة القومية للمحاكم الثورية ( هلهوطة بركوتة )‎

والإخوان بيهددوا العيال بتوع الثورة والثوار بيهددوا العيال بتوع الإخوان وشفيق بيهدد مرسى بالكرسى ومرسى بيهدد عصام نمرة 1 ونمرة 2 والنائب العام بيهدد أم حمدى.. وأم حمدى بتهدد الريس وأصبحنا فى حسبة برما القضائية تفتكروا دى بلد ياناس كل الناس رافعة السيوف على كتفها ولا عادل إمام فى عنتر شايل سيفة وبدل ماكنا هنعيش فى تبات ونبات ونخلف صبيان وبنات بعد الثورة الميمونة أصبحنا واقفين لبعض زى توم وجيرى آل يعنى محاكم بحق وحقيق دة كفاية  قضية القديسين والوجهة المجهول الموجود على صارى الكنيسة والذى يشبة وجة النائب العام  ودم اللى راحوا فيها مسلمين ومسيحين ولا الراجل اللى إسمة بلال ولا خالد سعيد ولا مجلس الوزرا ولا محمد محمود ولا بورسعيد ولا السيدة ولا السويس ولا ولا ولا ولا … مالكم ياناس ماتهمدوا شوية وخلى الريس يعرف يقول الكلمتين بتوعوا ولا السيد قنديل يعرف يبنى مصانع القطن الجديد ولا الأمن يشم نفسة شوية ع الناس… ياريت نهمد شوية عشان خاطر سيدى المبارك والموسم القضائى السنة دى ولعة وعلى ودنة ولا العم توفيق عكاشة وتارة البايت مع الفضائية المصرية وكل ماتروح مكان ولا تفتح تليفزيون يطلع لك خلف خلاف المحامى ويطلع لسانة ويقولك إحنا هنوريهم النجوم فى عز الضهر والظاهر إن إحنا محتاجين قضاة أجانب ولو من الصين أهوبرضة يسدوا خانة لكن هل تعتقدوا إن أم حمدى هتكسب الريس بسبب الأنبوبة طلعت مخرومة وبتنفس وولعت العشة والتليفزيون كمان وأعرف واحد رافع قضية على جارة عشان مبيسلمس علية ويقوم يقف وهوة بسلامتة معدى بالموكب بتاعة ..والله دى مصيبة بجد ولا مدام جيهان لما إتخانقت مع جوزها وضربتة بإيد الهون وأمين الشرطة قريبهم عمل محضر مايخرش المية ولبس الراجل قضية مخدرات ولا بتوع النيابة حالهم ياعينى لا يسر عدو  ولا إخوانى مشغولين لكيعانهم شغالين ليل نهار وكلة بحسابة طبعا تفتكروا هية دى المحكام الثورية التى كنا نتمناها بعد ثورة أخذت من ظهورنا تعب السنين وألهبت المشاعر الثورية فى كل بلاد العرب والعجم حتى أهل الكويت ثاروا عشان أم حمدى والأنبوبة أصل ماعندهومش مشاكل وبدأت بالفعل الحملة القومية للمحاكم الثورية ( هلهوطة بركوتة ) وبدون عطلة قضائية هذا العام وربنا يستر ع الجزارين ومشاكلهم مع الخرفان أكيد محتاجين إذن من النيابة للذبح هذا العام .