#نادية_الجندي تكشف موقفها من الزواج

حلت النجمة نادية الجندي ضيفة على برنامج “تفاعلكم” لتجيب عن العديد من الأمور الشخصية وحياتها الفنية.

ومن بين الأسئلة الموجهة لنادية الجندي، كانت نيتها للزواج مرة أخرى، وأجابت قائلة: “ليه لأ، لو صادفني حب من رجل محترم، ويقدر عملي ايه اللي يمنع يعني؟”.

وتحدثت نادية الجندي عن زواجها الأول من الفنان الراحل عماد حمدي، وقالت: “عماد حمدي رجل عظيم وفنان قدير، أنا كنت صغيرة عند إتمام زواجنا، لم أتجاوز الـ15، وهو كان في الـ60 من عمره، وطبعا كان حدث في الوسط الفني، إزاي لسه تلميذة في مدرسة وفي السن دا وتتجوز رجل أكبر منها بكل الفرق دا، لكن يكفي أن هو أبو ابني وأداني أهم شيء في حياتي”.

كما تطرق الحوار مع نادية الجندي لابنها هشام، وقالت: “ابني اسمه هشام، مسموش نادر زي ما بيطلعوا يقولوا في الصحافة ويكدبوا، بيكدبوا ويطلعوا صور شخص تاني، ابن عماد حمدي من مراته القديمة، لكن ابني اسمه هشام، ماينفعش ينسبوا لي واحد مش ابني، حتى ابني الحقيقي يزعل”.

وأضافت: هو مابيزعلش عشان عارف ان دي وشاية من بعض الناس اللي بتحاول تشاوشر على أي صورة حلوة وبيقولوا أكاذيب.