#بهاء_الدين_محمد عن #شيرين_عبدالوهاب: لو ليا سلطة عليها مش هخليها تنطق

علق الشاعر بهاء الدين محمد، على تصريحات الفنانة شيرين عبد الوهاب عن الراحل حسن أبو السعود.

وكتب بهاء الدين محمد عبر صفحته على موقع التواصل الاجتماعي Facebook: “حسن أبو السعود، حبيبي اللى عمرى ما حسيت إنه مش في الدنيا، واللى كل الوسط بيحبه وكان وجوده فى أى مكان بيعمل حالة من البهجة، بروحه الطيبة وقلبه اللى كله حب وفن “.

وأضاف: “الفنان اللى عملنا مع بعض نجاحات عايشه لحد النهاردة، ومنها أسف حبيبتي، لما النسيم، في ناس، أصعب حب، وعدى الليل، عمال يحكيلي عنها، ومئات الأغانى اللى كان بخبرته في اللايف بيعرف يجيب الجملة اللى الناس تحبها، وبالفعل سيطرنا سنين على الساحة الغنائية وغيرنا كتير، ده غير أنه كان من أفضل العازفين على الأكورديون في العالم”.

وتابع بهاء الدين محمد: “وفي يوم من الأيام وهو نايم تعبان لقيته إبتسم لي، وسألنى أنت عارف مين أكتر حد ح يزعل عليا لما أموت ؟ قلت له إسم من أسماء ولاده . قالى لأ أنت أكتر حد ح يزعل عليا، وبالفعل أنا مابقيتش حتى أمشى من شارع بيته، وفضلت فترة طويلة أنسى أنه مات لأنه عشرة فن وحياة، وكان بيحبنى كأنى إبنه وكان بيفرح لي بكل نجاح، حتى لو مش معاه وح أبقى احكيلكم إزاى إتقابلنا لأن الموضوع ده مهم”.

وعن تصريحات شيرين عبد الوهاب، كتب: “المهم علشان أقول اللى ضميرى بيحسه في موضوع شيرين عبدالوهاب، واللي جهات كتير عايزني اقول، رأي في كلامها عنه أو وصفها ، أنا بكل صراحة بقول محستش إنها قاصده تهينه ولا تسخر منه، هي بس استدعت سيرته بشكل يبدو ساخر، لكن أنا رغم إنى متضايق منها، وهو عندي من أغلى الناس، إلا إن إحساسي قالي انها ماتقصدش”.

وواصل: “لأن فعلا لما كنا بنتقابل كان بيحتفل بشيرين وبيحب فنها، والبساطة اللى فيها وهى كانت بتحبه وتحترمه، وللعلم أنا لما كنت اروح له وشبعان ومش طايق أشوف أكل أول ما يقولى تاكل بأداء مشوفتش زيه بلاقى نفسي أجوع، الله يرحمه كان فنان ودمه خفيف و قلبه قلب طفل”.

وأختتم: “بس هى غلطانة إنها بتطلع تتكلم، ولو ليا سلطة عليها مش هخليها تنطق لا على مسرح ولا لقاء ولا حتى في حياتها الشخصية، أسكتى يا شيرين”.