#محمد_رشاد: اللي حصل يوم الفرح مكانش ينفع يعدي

حرص المطرب محمد رشاد، على توضيح قصة الخلاف الذي وقع بينه وبين الإعلامية مي حلمي، والسبب وراء إلغاء حفل زفافهما قبل بدءه بساعات، مطمئنًا جمهورهما على صحتها.

وقال رشاد، في مداخلة هاتفية مع الإعلامي وائل الإبراشي، في برنامجه «كل يوم» المذاع على فضائية «أون إي»، اليوم الثلاثاء: «أنا مش هتكلم في أسباب خلاف لأنها بتحصل كتير وواردة بين أي اتنين بيحبوا بعض، ولكن أنا بقول إن اللي بنا حب كبير متبادل وعلاقة طيبة وعشرة».

وأضاف: «المشاكل بتحصل ممكن تكون من الأهل أو من الأصحاب، ولكن لازم الناس تفهم إن عدم اكتمال الفرحة إحساس صعب جدًا عليا وعلى مي، ولكن اللي حصل يوم الفرح مكنش ينفع أنا أتغاضى عنه ولا أهلي، فهو سوء تفاهم حصل بينا وكان السبب إن في ناس من الأصدقاء دخلت في النص وصلت كلام هنا وهنا وعملوا فتنة بينا للآسف».

ونفى محمد رشاد، كل الأقاويل حول إلغاء الزفاف بسبب «القايمة»، متابعًا: «الماديات عمرها ما كانت مشكلة ما بين اتنين بيحبوا بعض، يعني الناس كلها ممكن تعديها بس في اتفاقيات ممكن لو اتغيرت، أو لو حد وصل بصورة غير صحيحة إن في عدم موافقة على اتفاق حصل بيتسبب مشكلة».

وأنهى رشاد، حديثه قائلًا: «سواء حصل نصيب أو لأ أتمنى إن ربنا يجعل الخير في طريقنا احنا الاتنين وما بينا.. مي كانت بتحضر للفرحة دي بشكل هستيري وأنا كنت محضر أغنية ليها ولأي حد بيتجوز.. اه مي كانت تعبانة من قبل الفرح وبسبب الضغوطات اللي حصل في الفرح اتسببتلها في أزمة بالتنفس ولكن مفيش أي جلطة الحمد لله وبخير».

وأوضح: «وأنا دلوقتي على تواصل معاها وبنحاول نحل المشاكل اللي حصلت.. وفي الآخر محدش هيعرف الحقيقة غير مني أنا وهي وده عمره ما هيحصل لأن دي خصوصيات بينا فقط وكل ما يتداول ليس حقيقي».