“قلم وصاية” : الكذب الذى نحب ان نصدقه!

يعنى انت بتلتزم بالاخلاق علشان ضميرك، و لا علشان خايف لحسن تنكشف – لو طلعت منك اللعبة اوت – و لا علشان سمعتك كانسان صادق هاتكون اتفشفشت؟ و لا لانك – للأسف – لا تتقن الكذب..مثلا؟ هل يحسب البعض "العائد" الذى يعود عليه ده من الاخلاق، ثم يزنه بميزان المنافع المادية؟
اليس من العار مثلا قبض ثمن الاعمال الخيرية اصواتا بالانتخابات؟ لا؟ مثالية؟بلاش دى..هل ما يهمنا حقا و بالاساس هو "الاخلاق" عند تزويج بناتنا؟ طيب هل مايهمنا فقط – او معظمنا كرجال – هو حقا اخلاق المرأة..فقط؟
و هل لو توافرت انثى اخرى اكثر جمالا و تزوجها بنفس سهولة زواجك من زوجتك الوفية المخلصة الـ..الـ…، كنت ستتركها و تتمسك بربه الصون و العفاف الاولى؟
احقا ان الاخلاق هو شغلك الشاغل؟ و هو محور حياتك؟ بذمتك ده مجتمع اخلاقى؟ هذا المجتمع الذى يتباهى بتدينه على جميع دول العالم، هل هو مجتمع اخلاقى و متدين فعلا؟ هل لانه انتخب رجلا متطرف دينيا فى البرلمان فهذا يعكس تقديره للدين؟ بذمتك؟
ثم ايه حوار "عاداتنا و تقاليدنا و ديننا" دول اللى بنجيب سيريتهم و احنا بنتكلم على اى عالم جديد علينا تماما زى عالم التكنولجيا او المدونات او الفيسبوك؟ ليه بنحلل لنفسنا الغلط؟
طيب بلاش دى برضه..ليه بنحرم على نفسنا الصح؟ طيب ليه بنستعبط؟ ثم بالنسبة لعاداتنا و تقاليدنا و تاريخنا..من امتى السياحة كان ينفع معاها احتشام؟ هل كان من عاداتنا و تقاليدنا و ديننا نزول البحر بملابسنا و بالاحذية؟ حتى للرجال؟ بعد مئات السنين بقت الف ليلة و ليلة حرام؟
ساعات بأحس ان الانتخابات النزيهة دى برضه بقت حاجة غريبة على بلد لها عاداتها و تقاليدها العريقة..و لا تتناسب مع ثقافتنا و تديننا!الا صحيح هم فاكرين ان الليبراليين لديهم مشروع لاقرار زواج الشواذ فى مصر؟ الا صحيح العلمانية كفر رغم ان من مؤسسيها ابن رشد و اشهر مطبقيها تركيا بتاعة اردوغان؟ ثم احنا عاملين دورى كورة ليه؟ علشان نادى واحد بس يفضل يكسب البطولة على طول؟ و احيانا نادى تانى..
ناديين بس؟ القاهرة عاصمة الثقافة العربية هى نفسها عاصمة دولة 40% من سكانها اميين و مثلهم لا يقرأون تقريبا اى كتاب غير دينى! ده ان قرأوه!فيه حاجة غريبة قوى برضه..احنا بنعامل كل حاجة فى حياتنا بمنطق البرامج التعليمية..يعنى استفيد منه..يعلمنى حاجة..اطلع منه بمعلومة..ازاى يا بشر نقيم الموسيقى و الرسم و النحت و التصوير و الباليه و مشاهدة الرياضة و الشعر بهذا المنطق.. بتاع الخضرية و الفكهانية؟ايه منطق الحضانة ده؟ يا جماعة اطلعوا من قمقم مسلسل "سر الارض" ده شوية! السينما و المسرح و الشعر مش كدة!
نح قوم نظهر لبعضنا تقديرنا للشهادات الجامعية رغم ان احترامنا الاساسى هو للقرش! المال! ليس للشهادة و لا للعمل..بل للمال..و لكن يجب علينا ان نكذب جميعا على بعضنا البعض..ثم آه..العمل عندنا عيب..و كمان بنعاير بيه بعضنا..معلهش يا عزيزى القارئ..ستزعل من هذا الكلام..
بس الاخلاق مهياش كل حاجة..و ده بيبان فى نظرات الحسرة اللى فى عينيك لما بتشوف كليبات نانسى مثلا و لا صور قصور الرئاسة ! انت فيه – عدم اللامؤاخذة – حاجات تانية بتهمك اكتر! ماتمثلش!