ثروتي ملايات سراير وحلل

بعد سنوات طويلة من الغربة، وبعد استقراري في الوطن،اكتشفت ان كل ثروتي هدوم وملايات سراير واطباق وصواني وحلل وكوبيات وكاسات،وعفش كتير مضيق خلقى ومضيق علينا البيت
كل حاجه كنت اجيبها اشيلها لمصر،وكل اجازه انزل معايا حاجات وارجع وانسى جبت ايه واشتري تاني وفي الاجازه اخدهم لمصر الخ الخ الخ
في الغربه نسينا نعيش حياتنا، وكانت الحياة مؤجله لحد مانرجع مصر
رجعت مصر علشان اعمل جراحه خطيره،وكان لازم اسيب شغلي هناك علشان طول مدة العلاج والتي تجاوزت الست اشهر
والمتابعه الطبيه المستمرة حتى الان
انتظرت ان تمر السنوات بخير حتى استمتع بحياتي مع زوجي ونعوض اللي فات
ولكن القدر كان لنا بالمرصاد فمات زوجي ،هو بكامل صحته بعد 3 سنوات من عودتنا لمصر
وكل كذا شهر اقلب كل مافي الدواليب والشنط على الارض والم في اكياس ،واقول لقرايبي واصحابي اللي عايز حاجه يجي ياخدها،والباقي اوزعه على المحتاجين و الجمعيات الخيرية
كم انت مسكين ايها المصري المغترب
محموم دايما بالعودة للوطن
ولما ترجع بتلاقي نفسك في مرحلة العد التنازلي من الحياة
يالا
الحمد لله على كل حال