ياريس….. فيه حاجه غلط

ولما تلاقي كل اللي حواليها اللي انتخبوا السيسي وبيحبوه مليانين حزن ويمكن ابتدوا يغيروا وجهة نظرهم في السيسي
يبقى أكيد فيه حاجه غلط؟

لما السناوي الناصري يطلع يقول السيسي قال مبارك جاب البلد اﻷرض وكلنا نكدبه وبعدين نلاقي ان السناوي كان سمسار الصفقة مع طارق عبد الجابر اﻹخوانجي غير التائب وعودته لمصر يبقى فيه حاجه غلط.

لما مباحثات الجزر كانت من السنه اللي فاتت ونتفاجيء بيها في زيارة الملك سلمان يبقى فيه حاجه غلط.

لما الرياسه تتعامل مع الشعب المصري وكإننا في ثكنة من ثكنات الجيش نسمع اﻷوامر او نتفاجيء بيها ولازم نقول تمام يافندم يبقى فيه حاجه غلط.

لا أشكك ابدا في السيسي،
وأثق فيه ثقة عمياء،
وأنا لا أحبه فقط بل أعشقه،
ولكنني أرفض سوء اﻹدارة،
وأرفض بطانته ومستشارية الذين أفهموه
إن الشعب بيحبه،
وإنه مهما حصل،
حايقول له سمعا وطاعة،
وإننا ممكن نغضب شوية،
ويطلعوا لنا احمد موسى علشان يقنعنا،
ولﻷسف إن أحمد موسى نفسه لم يعد له مصداقية عند جمهوره.

ولما الرئيس يعتمد على شوية اﻹعلاميين المشبوهين اللي بيجتمع بيهم كل مره إن دول حايغيروا الرأي العام يبقى فيه حاجه غلط.

لما الرياسة تفضل ساكته على كل واحد يطلع يقول السيسي قال ومايكدبوش الكلام ده ويسبونا في حيره وينقسم مؤيدينك وتخسر قطاع عريض منهم يبقى فيه حاجه غلط.

أصل كده الرياسه تبقى عايشه في برج عاجي ومنفصله عن الشعب.
ارجوك ياسيادة الرئيس غير اللي حواليك ومستشارينك اللي عايشين مع نفسهم، وفاهمين إن خلاص البلد دي عزبة أبوهم.
ملحوظة:من كتر حبي للسيسي ولادي بيقولوا لي غيري اسمك إيمان السيسي، فمحدش يطلع يزايد علي من فضلكم.