رأي 11
تحشيش ع الهوا
بث مباشر من مصر
ما هو نوع الحشيش المستخدم في الحوار الوطني السري ؟ طبعا الذي لم يمت من الضحك على حلفان مجدي حسين على المصحف بان أجزاء من الحوار السري لا يجب تسريبها للاعلام، لابد وانه أغمى عليه من الضحك وهو يستمع الي هبل ايمن نور وهو يهوش إثيوبيا بطائرات بترضع بعضها بنزين فوق أجواء السودان، وطبعا دي غير رضاعة الكبير وغسل الثدي ورضاعة الأخ هشام قنديل. على فكرة أفكار الغرف المغلقة ليست افضل مما سمعه العالم من كمية الهرتلة والعبط بتاع المذكور ايمن نور أو الزين مجدي حسين، غير الكلام الهمام بتاع باكينام.
لو كانت إثيوبيا مش ناوية تبني سد — ولو انا مكان إثيوبيا — وتعرضت لكل هذا الهرش مخ على الهواء مباشرة وكنت اعمل لمصر حساب من قبل لبنينا بدل السد عشرة، لان بلد يقودها أناس بهذا الشكل لا يجب ان تأخذ في الحسبان. من شاهد مجدي حسين بعد ما مات في هدومه من الكسوف بعد ما واحد قاله ان اللقاء يبث ع الهوا ومفيش داعي تحلف الناس ع المصحف، من شاهد هذا يخيل اليه ان ما رآه هو بث مباشر من السرايا الصفرا من العباسية ومن سراي المجانين أو انه بيتفرج على فيلم اسماعيل يس في الاتحادية.يا دين النبييييييي .. معقول اللي شأفته مصر ده وشافه العالم؟لو فعلا اللي سمعنه ع الهوا يعكس طريقة حكم مصر يبقى كل واحد فينا يفكر لوحده ولمصلحته فقط. دا ايمن نور — دا طلع– حاجة ميعرفش باسم يوسف يؤلفها لو حب. ما رأيناه يجعل برنامج البرنامج يبدو كنشرة اخبار من شدة جديته مقارنة بما رأيناه من بث مباشر على الهوا لما وصل اليه العبط الإنساني .دا إحنا كدا أصبحنا رسمي الحلقة المفقودة بين من يضربون بانجو ع الريق وبين الذين يضربون حشيش مغربي مغشوش. ما كانش ناقص غير الرياسة تأجر جمهور عشان يقول لبكينام الشرقاوي وفرقة التحشيش — عظمة على عظمة يا ست.