د. ماهر حبيب يكتب: تبات تعلم فى المتبلم يصبح ناسى

معلقة من طبق الكشرى

واللى ييجى فى الريش بقشيش

وخدوا الشر وراحوا وفداكى يا مصريين يمكن كان حا يحصل لكم حاجة وربنا لطف قدر ولطف ومفيش مشكلة.

ايه يعنى أن خزنة الهيئة ليها مفتاح واحد؟

ايه يعنى أن الخزنة مع شخص واحد؟

ايه يعنى أن مفيش كاميرات؟!!!!

لا بلاش إفتراء ده فيه كاميرات  بس بتشتغل بالنهار بس علشان النهار ليه عينين وهو عمركم شوفتوا حرامي بيسرق بالليل ده كل الحرامية المصريين بيسرقوا البلد عينى عينك وعلى عينك يا تاجر فى عز الضهر الأحمر  ( ده غير عز بتاع البرلمان )

ما تزعلوش قوى …هو الدهب ده مش جزء من ثروة مصر واللى سرقها شوية مصريين ودول لو حسبناهم حا نلاقى أمنهم 12 مليون جنية بس…. ليه بقى تحسدوا كام مصرى بقوا فى ليلة واحدة مليونيرات وهما كانوا بيتفرجوا على فيلم عاوز حقى وهما خدوا حقهم تالت ومتلت ويا ناس يا شر كفاية قر.

عادى قوى يبقى فيه إهمال

عادى قوى يبقى حاميها حراميها

عادى قوى انه يبقى فيه عصابات بتعمل الجريمة الكاملة

عادى قوى يبقى مفيش رقابة

عادى قوى يبقى مفيش كاميرات

عادى قوى نقول سرقوا الصندوق يا محمد لكن مفتاحه معايا.

زمان سرقوا الونش وسرقوا زهرة الخشخاش فأيه المشكلة انهم سرقوا 50 كيلو دهب بس مش كتر خيرهم انهم ما سرقوش المصلحة كلها وييجوا الموظفين ما يلاقوش المصلحة كنا حا نعمل ايه ساعتها

 يلا بقى يا جماعة غزة وراحت زى شكة الدبوس  ووجع ساعة والا كل ساعة وما تحسدوش الحرامية علشان على حظهم الأسود الدهب نازل اليومين دول مش كنتوا سيبتوا لهم دولارات.

ما تزعلوش يا جماعة علشان لسه السنجة بتقع والكومسارى بينزل يركبها و تبات تعلم ف المتبلم يصبح ناسى