رسالة من الإعلامي محمد صلاح الزهار: “بلاغ للنائب العام”!

السيد الأستاذ المستشار النائب العام

تحياتي وإحترامي

مقدمه لسيادتكم مواطن غلبان من المصريين اللى قاعدين يتفرجوا على اللي بيحصل فى البلد،من أربع سنين، وكأنه ماتش كورة ، بأصقف للعبة الحلوة وبأزعل من اللعبة الوحشة، وبصراحة معاليك اللعب الوحش بقا كتير أوي أوي، لما إيدي ووشى وجعوني من اللطم !

يامعالي النائب العام .. لا أنا من الثوار ولا روحت ميدان التحرير ، ولا كنت فى إعتصام رابعة، ولا نزلت فى تلاتين يونيو ، وما روحتش الإنتخابات البرلمانية والرئاسية اللى فاتت واللى قبليها، وما روحتش الإستفتاء على تعديل دستور 2013 و2014، إنما الإستفتاء الوحيد اللى روحتوا بعد يناير 2011 ، كان إستفتاء 19 مارس 2011 ، وروحت قولت نعم .. كنت عاوز البلد تمشي ، انما عرفت بعد كده إن اللى قال نعم ، يبقي مع الجماعة اللى عاملين فيها بتوع ربنا ، فقلت أنا اللى غلطان وحلفت ما اعتب أى لجنة إنتخابية مرة تانية !

ممكن سيادتك تحولني للنيابة بتهمة الإمتناع عن المشاركة فى الإنتخابات والإستفتاءات ، ممكن وانا مستعد اروح ادفع الغرامة ويا دار ما دخلك شر !!

يا معالي النائب العام أنا بأقدم البلاغ ده لسيادتك بعد ما العملية بقت ” خل ” خالص ، بعد المهندس احمد عز ما أعلن إنوا هايرشح نفسه فى الإنتخابات بعد ما طلع براءة من كل التهم المالية اللى ساعدوا فى الحصول عليها القوانيين اللى أصلت وقننت الإستيلاء على فلوس البلد الغلبانة ، إنما سيادتك ،وبما إني عارف شوية فى القانون ، بأطلب من سيادتك و بأحلفك باغلي حاجة عندك ، وعشان خاطر الغلابة، أرجوك أأمر بفتح ملف تزوير إنتخابات 2010 اللى هندسها وظبطها احمد عز، مع بعض ظباط امن الدولة ، وخلي الحزب الوطني المأسوف عليه ياخد 99% من عدد مقاعد البرلمان ، يا معالي النائب العام ده ربنا إستغفر الله العظيم ماعليهوش 99% إجماع من اهل الأرض ، نص اهل الأرض مؤمنيين برسالات سماوية والنص التاني لأ !!!!!!!

يا معالي النائب العام .. ما أعلمه إن جرائم تزوير إرادة الناس لا تسقط بالتقادم ، وبعدين تقادم إيه ده لسه بقالها اربع سنين بس ، بأطلب من سياتك يجيبولك كشف بأكثر من 2000 حكم قضائي أصدرتها محاكم القضاء الإداري بتثبت تزوير إنتخابات 2010 ، اللى هندسها أحمد عز !!!!

يا معالي النائب العام .. لو عاوز اكتر أطلب ملف تزوير إنتخابات التجديد النصفي لعضوية مجلس الشوري اللى جرت فى أوائل 2010 ، برضوا سيادتك إتزورت وإتهندست بمعرفة احمد عز !

عاوز اكتر .. اطلب تقارير تقصي الحقائق فى حوادث العبارة وقطار العياط وسقوط صخرة الدويقة وغيرها وغيرها من الحوادث اللى راح فيها الاف الغلابة، والبرلمان اللى كان بيسيطر عليه احمد وحزبه أسقطوا كل الإستجوابات والإتهامات اللى إتوجهت للحكومة ، وإنتقلوا لجدول الأعمال !!

يا معالي النائب العام .. دم المصريين لسه ما بردش ، وفلوسهم راحت فى داهية ، طب ماشي ممكن ننسي اللى فات ، إنما ممكن نستني لما أحمد عز يبقي نائب فى البرلمان ، عشان يتقدم بمشروع قانون يطالب فيه بمحاكمة كل اللى إتجرأ على الحزب الوطني وعلى رئيسوا وأعضاءه !

يا معالي النائب العام .. يا تلحقنا يا ماتلحقناش !!!!!

مقدمه لسيادتكم

مواطن مصري غلبان ، نفسوا ولادوا يطلعوا فى مجتمع محترم !!!!!