رياضة
أولتراس أهلاوي يصدر بيان شديد اللهجة
أعلن مساء أمس الجمعة، أولتراس أهلاوي عبر صفحته الرسمية على موقع التواصل الاجتماعي “فيس بوك”، في بيان شديد اللهجة عدم تواجده في مباراة الأهلي واتحاد الشرطة، المقرر اقامتها اليوم السبت، في الخامسة مساءً على ملعب المقاولون العرب، وتم نقلها إلى ملعب 30 يونيو.
جاء نص البيان كالتالي:
لما جمهور الاهلي في نهائي الكونفدرالية حاول يفهم الناس حاجة بديهية ان الكورة للجماهير بكل لغات العالم
قولنا في رسالتنا يمكن تفهموا
للاسف كنا متعشمين في شوية جهلة ومرتزقة وفشلة انهم يفهموا
عندنا في بلدنا اللي متحكمين في الكورة في مصر لاعب كرة طائرة ومحاسب فاشل
بيتحكم في اكبر اتحاد كرة محلي في افريقيا ناس مش مهم ليهم الجمهور يكون موجود في الماتشات
ناس فرحانة بوجود اندية المؤسسات والشركات اللي بتقرر مين يحضر ومين ميحضرش
في الدور الاول لما قولتوا ان الدور التاني هيبقى بجمهور
حطيت شرط ليه يخلي اي حد مش عايز جمهور انه يطلب ده
يعني ايه اصلا حد بيلعب كورة وفي الدوري الاقوى علي المستوى الافريقي والعربي يقول مش عايز جمهور
بتلعبوا كورة ليه يا ……؟
بس العيب مش عليكم العيب على شوية الفشلة اللي مسؤولين عن الكورة في مصر
الفاشل لو فضل في مكانه هيفضل يفشل
الفاشل اللي في عهده منتخب مصر مصعدش 3 كأس امم ورا بعض ده غير تدهور منتخبات الناشئين
لو في حد بيحاسب حد في البلد مكانش ده بقى الحال
اتحاد الكورة اللي المفروض والطبيعي لما اندية تطلب انه مش عايز جمهور يسأله اومال بتلعب كورة ليه هو اللي حط بند بيتيح لك انك ممكن تلعب من غير جمهور !!!!
وييجوا في الاخر يسألوا هو مين اللي بيستعدي الجمهور والشباب ؟!!
والاندية اللي طلبت ان الماتشات تبقى من غير جمهور
متخيل لما تقابل الفرق الجماهيرية بعد سنة او اتنين او عشرة ممكن يستقبلوك ازاي ؟!!
لما كان قبل كدة عساكر الجيش والشرطة بيجوا يشجعوا فرقهم كان على قلبكم زي العسل
بس عشان دلوقتي في استعداء واضح لجمهور الكورة وللشباب عموما فحصل تواطؤ عشان تمنعوا الجمهور
عايزينكم بس تتأكدوا ان الخوف اللي جواكم دلوقتي
هتشوف أوسخ منه بمراحل لما في يوم هتقابل الجماهير دي
انتوا اللي بتزرعوا الكراهية وانتوا اللي هتحصدوا نتايجها
ده وعد !
وطبعا ادارة الاهلي كعادتها الفترة الاخيرة قايمة بدور المتفرج
مفيش قوة شخصية مخلي اتحاد الكورة ياخد قرارات زي دي ويظلم الاهلي عشان عارف ان مفيش اي رد فعل هيتم من جانبكم
حتى لما طلبتوا حكام اجانب وهي حاجة في لوايحهم بس مفيش حد استجاب لكم
محتاجين حد يفوقكم ؟!!
ولا محتاجين حد يفكركم انكم ادارة النادي الأهلي ؟
افضلوا اتحايلوا علي القوانين وانقلوا الماتش من ستاد لاستاد تاني . بس في يوم هتلاقوا الجمهور قدامكم غصب عنكم . وساعتها مفيش لوائح شاذة هتساعدك ..
لن يكون لجروب اولتراس اهلاوي تواجد في مباراة الغد . نلقاكم في مباراة وادي دجلة .
دامت الكرة للجماهير . ودمتم فشلة