بلد النص .. نص والرقص على السلالم‎

وعندما نتحدث عن البرلمان نجد من يقول نريد برلمان متوازن تمثل فيه كل التيارات السياسية وهو امر غريب كيف يمكن تحقيق ذلك الا اذا كان هناك من ينوى تعيين اعضاء البرلمان ويفرضهم على الشعب الذى قد يختار أمرا آخر واعضاء آخرين قد لا يكون منهم بعض التيارات السياسية وايضا خللينا نمشيها كدة ، والدستور الذى نتطلع اليه ليؤسس لدولة حديثة ديموقراطية تلحق بالقرن ٢١ نتحدث عن دستور توافقى يعنى شوية عليك وشوية علينا فوت لى مادة وافوت لك مادة ونمشيها كدة نص.. نص يعنى ، طيب وتشكيل الحكومة فيما هو آت من الزمان قال لك برشة نمشيها الدفاع والخارجية والداخلية ومش عارف إيه كمان يختارهم الرئيس والشوية الباقيين يختارهم مجلس النواب ورئيس الوزراء  نعمل طوس ومشى حالك برضه نص..نص على فكرة ده هيتكتب فى الدستور والأنكت انهم بيعتبروه إبداع محصلش فى صنع الدساتير يا أسيادنا ، شيبنا من كل ده وتغلبوا نشوف المشهد السياسى حلوة المشهد دى ؟ عندنا جماعة وليها حزب النص جماعة والنص حزب مش كدة ، وعندنا كمان جبهة وليها برضه حزب لا الحقيقة ليها حزبين واحد نور وواحد مش نور ، ولسة كمان الإبداعات كتيرة آخرها التيارات وشوف يا سيدى التيار الثالث والتيار الشعبى والتيار الوطنى وناقص التيار المستمر والتيار المتقطع وعلى حزب الريح ما يودى ، ده غير احزاب ما انزل الله بها من سلطان من المؤتمر اللى مش هندى الى الدستور اللى لسة متعملشى والغد يعنى بكرة وغد تانى مش بكرة لكن بعد بكرة والاشتراكى الثورى والاشتراكى اللى مش ثورى والاشتراكى التجمعى والوفد الجديد وده غير الوفد ولو فيها رفد حتى الاحزاب نصصناها كل حزب انقسم لحزبين زى الاميبا تتكاثر بالانقسام ، نقول كمان وللا كفاية كدة ؟ آخر حاجة سألنا السيد الدكتور رئيس لجنة وضع مواد الدفاع والأمن القومى فى تأسيسية الدستور وهى لجنة مهمتها لو تعلمون خطيرة عمن استمعت اللجنة لآبائهم من المتخصصين فأجاب أمناء الشرطة !؟ وتخيلت انى اسأل الفنانة الكبيرة سهير البابلى هو اسم نظام البلد دى إيه فأجابتنى .. عايز الاسم كله ولا حتة منه .. حتىة منه وللا كله ؟ البلد دى بلد النص .. نص .. افيقوا او لا تفيقوا ومشوها كدة