#أحمد_سلامة عن إطلالات ابنته #سارة_سلامة الجريئة: قولتلها متعملش كده تاني

كشف الفنان أحمد سلامة حقيقة وقوع خلاف بينه وبين ابنته سارة سلامة بسبب إطلالتها الجريئة في جلسات التصوير.

وقال أحمد سلامة خلال لقائه في برنامج “نص الكلام” من تقديم راغدة شلهوب عبر قناة “النهار”: قولتلها متعملش كده تاني لكن مش لدرجة خلاف، قولت أن الأفكار اللي هي شايفاها وكل الجيل شايفها صح تنفع في الخارج لكن أحنا في مجتمع شرقي مينفعش نتخطاه، هي وجهة نظرها أنها مش بتعمل حاجة غلط.

وأكمل: هي وعدتني أنها مش هتعمل كده، في مسلسل “ابن حلال” لما طلعت لابسه شورت وأنا اتهاجمت بسببها، في ستايلست طلبت منها تلبس دا وهي بتسمع الكلام مكنتش فاهمة كان عندها 18 سنة ومعندهاش خبرة.

وتابع: مسألة السيطرة على الجيل الحالي جيل السوشيال ميديا والعالم المفتوح صعبة وقاتلة، السوشيال ميديا بتربي معانا مش إحنا اللي بنربي بنفسنا، هذا الجهاز النقمة على العالم خلى أفكار الشباب منفتحة وشايفين أن كل حاجة عادي، لكن أنا بحاول أسيطر وعمري ما مديت أيدي على بنتي وبديها الحرية.