#عمرو_أديب يفتح النار على #محمد_رمضان

علق الإعلامي عمرو أديب على التحدي الذي قام به محمد رمضان وسفره إلى الإسكندرية بعد حملة إلغاء حفله هناك التي روجت لها صفحات عبر مواقع التواصل الاجتماعي.

وانتقد عمرو أديب خلال حلقة الجمعة من برنامجه “الحكاية” تصرفات محمد رمضان موضحا أنه كان من الممكن أن يسبب أزمة كبيرة وقال: الأستاذ محمد رمضان قرر فجأة أنه إزاي أهل إسكندرية مش عاوزينه يجي، فقرر أنه يعمل التحدي الكبير وينزل إسكندرية بنفسه يعدي على حارة حارة ويعرف أنتوا بتحبوني ولا لأ، شيء غريب بعض الناس قالوا أحنا مش عاوزين وأنت قولت لأ عاوزين، عاوزكم تتخيلوا حاجة لما الفنان محمد رمضان نزل بموتوسكلاته، تخيل لو كان حصلت خناقة ودا كان وارد بين الناس اللي بتحب محمد رمضان والناس اللي مش بتحبه، جم قالوا أنه كان في قهوة “والي” والقهوة دي كلنا عارفينها طردوه، وفي ناس قالوا مطردش، سواء دا حصل أو محصلش هو ينفع الكلام دا، هو يفنع حد يقوله أنت متجيش والتاني يقول أنا جاي، لو كانوا ضربوا بعض ولا محمد رمضان نفسه اتعور إيه الفكرة دي هو الفن كده، هو الفن غصب.

وتابع: أنت تروح تعمل حفلتك واللي عايز يشوف محمد رمضان يشوفه واللي مش عايز ميشوفش، إنما أنزل وأعمل تحدي في الشوارع واللي بيحبني يطلع لي، لو كان طلع الناس اللي مش بتحبك زي ما اتقال أن دول اللي كانوا في القهوة، عمر ما نزلت أم كلثوم ولا محمود ياسين ولا أحمد زكي، هي التذكرة الناس تحضر الحفلة أهلا وسهلا، وحفلاتك الناس تحضرها أرجو أن هذا الأمر يقف لحد هنا ولا يتطور إلى يوم 7 أكتوبر ولا نرى مؤيدي محمد رمضان ورافضي محمد رمضان وجها لوجه في شوارع الإسكندرية أنتوا في إيه ولا في إيه هل دا يرضي حد هي دي طريقة أن حد يبقى عنده رضى جماهيري أو رفض جماهيري.

وأكمل: هل دي طريقة في الفن، هما الشباب اللي حواليك تبع مين لو عاوز نسأل أسئلة كتير ممكن نسألها لو الناس دي اتخانقت مع بعض ولا الموتوسيكلات عملت حوادث كان هيبقى في رقبة مين، وهذا الأمر هي الدولة حمله، هذا الأمر بهذا الشكل العشوائي البدائي لا يصلح أبدا ومش فاهم الحكاية دي اتعملت ازاي وليه.