القصة الكاملة لأزمة تامر أمين

«يعني للأسف الشديد وأنا بقول هذا الكلام ومتزعلوش مني في الريف وفي الصعيد فيه نسبة كبيرة جدا بيخلفوا أولاد وبنات مش عشان يصرفوا عليهم ولا عشان يدخلوهم التعليم ويتعلموا ويكبروا ويتوظفوا أو يبقى عندهم فرص عمل..لا.. ده بيخلفوهم عشان العيال دي هي اللي تصرف على الأب والأم.. وفيه أسر كتير كتير قوي بيخلف الولد وأول ما الولد ده يبقى عنده 5 أو 6 سنين 7 سنين بالكتير، يقوم هوب راميه على ورشة ورشة سمكرة ..ورشة حداداة.. ورشة دوكو ..ورشة إصلاح سيارات.. يشتغل فواعلي.. يشتغل في البنا.. يشتغل في المعمار.. المهم يشتغل واللي بنسميه إعلاميا بلية.. عارفين الواد بلية.. اللي هو صبي المعلم وصبي الأسطى.. فيروح والأسطى آخر الشهر يديله 500 جنيه أو 1000 جنيه أو 700 جنيه.. ماهو واد صغير 7 سنين.. وياخد الواد الصغير الألف جنيه ويعمل إيه.. يروح يرميهم في حجر ابوه».

بهذه الكلمات تحدث الإعلامي تامر أمين في برنامج «آخر النهار» المذاع عبر فضائية «النهار» مضيفًا: «ده الولاد.. طب جاني بنت.. هغلب؟.. لا.. هدخلها المدرسة؟.. لا.. أول ما تبقى 8 أو 9 سنين أشحن تشتغل في البيوت.. وفيه أزمة في القاهرة والإسكندرية والمحافظات الكبرى في الخادمات والعاملات في المنزل.. فاشحن فالبنت لا تستمتع بطفولتها وبالبراءة بتاعتها ويطلع عنيها.. وياسلام لو ست البيت بتكهربها ولا بتلسوعها ولا بتعمل بلاوي سودا من اللي بنسمع عنها وبتشغلها 24 ساعة وبتديها آخر الشهر ألف جنيه..وتجري أخر الشهر تحطهم فين في حجر أبوها».

وتسببت هذه الكلمات في حالة غضب عارمة لدى أهل الصعيد وانتشرت عشرات الفيديوهات التي ترد على تامر أمين على موقع «يوتيوب» كما علق الآلاف من الصعايدة على الصفحة الرسمية لقناة النهار، مطالبين بإقالة المذيع تامر أمين ومنعه من الظهور على شاشة القناة بعد سبه لفتيات الصعيد.

وردت قناة النهار بفيديو للإعلامي تامر أمين نشرته على الصفحة الرسمية للقناة على موقع التواصل الاجتماعي «فيس بوك» رد فيه الإعلامي قائلًا: «أنا حبيت بس أعمل الفيديو ده بسرعة لأني لقيت حالة من حالات التضخيم والاصطياد في الماء العكر وفيه محاولة للوقيعة بيني وبين الجماهير، خصوصا حبايبنا وأخواتنا وأهالينا في الصعيد والريف، فحبيت أعمل الفيديو ده للتوضيح عشان نقطع الطريق أمام الناس اللي بتصطاد في المية العكرة.. الناس خدوا كلامي اللي بتكلم فيه عن مبادرة السيد الرئيس عبدالفتاح السيسي لوقف الزحف السكاني والتصدي للزيادة السكانية وحاولوا يصوروه على أني بهين أهالينا في الصعيد والريف».

وأضاف: «أولًا قبل ما نخش في التفاصيل لا أنا ولا غيري يجرؤ انه يهين الصعايدة أو أهلنا في الريف والفلاحين، لأني مقتنع أن الصعيد ده شرف مصر وعزة مصر وكرامة مصر وأصل مصر وكل القامات الثقافية والشعرية والحضارية والأدبية والسياسية طلعت من الصعيد والريف»، متابعًا «ثانيًا لأن أنا أصلا فلاح من الريف وأبويا أصلا من محافظة ريفية زراعية وبالتالي محدش بيهين نفسه».

واستطرد: «ثالثا وده الأهم لو بصيتو على الفيديو أنا ماليش دعوة بالحاجات اللي بيتم استقطاعها ونزولها على اليوتيوب لو جبتوا الفيديو الأصلي بتاع الحلقة أنا بتكلم أن فيه فئة قليلة من اللي بتخلف 8 و9 و10 لحد دلوقتي بيبقى هدفهم أنهم يعملوا وسيلة لكسب الرزق عشان يشحنوا أولادهم وبناتهم يشتغلوا في مشاغل ومصانع ويشتغلوا في ورش اللي هو الواد بلية ويشتغلوا في البيوت وكده، والفئة اللي بتعمل كده اللي احنا بندينها وعلى فكرة فيه ناس عندنا في القاهرة والإسكندرية وباقي المحافظات بيعملوا كده كمان، فده اللي أنا قولته وأحنا بندين هذه الفئة اللي للأسف مبتديش للطفولة حقها».

وقال تامر أمين: «لكن فيه كمان في الصعيد والريف ناس محترمة جدا وقبائل كبيرة وعزيزة وكلها فهم ووعي ووطنية وانتماء فأرجوكم واحنا بنتكلم عن الهدف والصالح العام أرجوكم بلاش فكرة الاصطياد والوقيعة دي لأني أعتقد أن الشعب المصري والصعايدة والريف أوعى من كل اللي بيصطادوا».

ووجه «أمين» رسالة لقناة الجزيرة قائلًا: «أنا بقول لقناة الجزيرة اللي نزلت هذا الكلام، هيهات الناس كويسة قوي والصعايدة والريف وأهل الريف والفلاحين عارفين مين هو تامر أمين وأنا كمان عارف أهلي وبلدي واللي جزمتهم على راسي من فوق».