فن
محمد أنور يهاجم الفنانين برسالة شديدة اللهجة
وجه الفنان الشاب محمد أنور رسالة شديدة اللهجة لبعض الممثلين خلال حسابه الرسمي على موقع انستجرام
تضمنت رسالة أنور هجومه لمنتقدى الاعمال الفنية الخاصة برمضان2019، كما اتهم بعض الفنانين دون ذكر الاسامي عن قيامهم بدفع اموال كثيرة لتصدر التريند بتويتر.
وتسببت هذه الرسالة فى انتشار حالة من الجدل الكبير بين الجماهير على مواقع التواصل الاجتماعي.
وقال محمد أنور عبر حسابه الرسمي، على “انستجرام”، ”أولا، مع احترامي لكل المخرجين والممثلين والمؤلفين اللي مشتغلوش في رمضان السنة دي واللي فعلا فيهم ناس كنير ونجوم كبار أنا شخصيا مفتقدهم كمتفرج، لكن فيه ناس مش فارق عدم وجودهم في شيء، بالعكس عدم وجودهم رحمة لينا كمشاهدين، وللأسف هما دول بقى اللي قاعدين يشتموا ويلعنوا في مستوى مسلسلات رمضان السنة دي، وإن المستوى ضعيف يا عيني على أساس أنهم لما كانوا بينزلوا بمسلسلات في رمضان كانو بيعملوا ”game of thrones“ و ”breaking bad“، والحقيقة بقى إنهم كانوا بيعملوا أفشل مسلسلات ومحدش كان بيحب يجرحهم ويقولهم إيه القرف ده“.
وأضاف، ”مش ذنب الناس اللي شغالة السنة دي إن حضرتك قاعد فاضي وبتحقد عليهم بدل ما تحترم الناس اللي اشتغلت السنة دي في ظروف صعبة جدااا عشان تقدم محتوى محترما، أنا مش ضد إن حد ينقد أي عمل فني بس يكون فعلا نقد بجد لكن أنا ضد الشتيمة وقلة الأدب لأي فنان لأن حضرتك السنة الجاية هتتحط مكانة وهنشتمك بأوسخ الألفاظ“.
وأردف “انور”، أنه ”للأسف الصحافة الفنية في مصر فيها ناس محترمة جدا وناقدين فنيين مهمين بيفيدوا الفنان فعلا بنقدهم سواء سلبي أو إيجابيين لكن للأسف الكثير منهم بيقولوا رأيهم في الفنان على حسب حبه أو كرهه له، أو إن الناقد ده صاحب الفنان الفلاني فبيشتم منافسين الفنان ده ويمدح فيه هو وبس، وكل فنان للأسف حواليه ناقدين بيمدحوه ويشتموا في منافسيه فتلاقي الناقد من دول بيمدح في عمل فني فاشل وفشله واضح للجميع، وبيشتم في عمل فني ناجح جدا“.
وتابع محمد أنور، أن ”الأغرب إنك تلاقي ناقد يطلع يقولك إن مسلسل كذه الناس بتشوفه ومسلسل كذه محدش بيشوفه، أنت عرفت منين الناس بتشوف إيه وما بتشوفش إيه، أنت نزلت سألت الـ١٠٠ مليون، ولا بتحسبها بالترند بتاع تويتر اللي بيتدفع فيه ٧ آلاف جنيه كل يوم، بطلو بقى كلام باسم الناس عشان إحنا كلنا هنا بنتوجه ناحية حاجة والناس في الشارع بتحب وبتتفرج على حاجة تانية خالص“.
واختتم أنور حديثه قائلا، ”أنا مش بتكلم عشاني أقسم بالله بالعكس أنا أكتر سنة السنة دي اتقال عليه كلام كويس جدا، والناس في الشارع والنقاد عجبهم شغلي الحمد لله وعارف إن بعد كلامي ده احتمال الإعجاب ده يتغير لشتيمة، لكن بصراحة الوضع العام بقى مقرف والأجواء دي غير صالحة للفن عموما“.