#مصر_بلادى_الجميلة 30 (#يعنى_ايه_كلمة_وطن؟)

#يعنى_ايه_كلمة_وطن ؟

النهارده وبكره وامبارح نعيش فى الوطن ، الحقيقة اتكلمت فى المعنى ده فى صفحتى على وسائل التواصل الاجتماعى ولكن اليوم تعالوا نحس مع بعض معنى الكلمة ، فيه ناس مابتفرقش بين الوطن والدولة لكن من وجهه نظرى الدوله بما لها وماعليها الى فناء وهى سنة الله فى خلقه وكم من حكام أتت على مصر سواء أحسنوا اليها ام لم يحسنوا فأين هم الان ؟ ولكن بقيت مصر الوطن ام الدنيا و ان شاء الله هتبقى اد الدنيا ، الوطن بيعنى الكثير الوطن هو كتاب الله مفتوح وصوت جميل من بعيد بيقول ايات ، الوطن هو ترنيمة حلوه ودانك تطرب لها وتقول الله ، الوطن صوت ادان بيجلجل وصوت جرس كنيسه بيصحى النايمين ، الوطن شاب قاعد بيذاكر والفجر يأذن  يقوم يصلى علشان ربنا يكرمه فى الامتحان ، الوطن ام سهرانه على ولادها وهم بيذاكروا وأيديها على خدها لحد ماراسها تميل من تعب السهر ، الوطن ضحكة بنت حلوه لحبيبها ولا طبطبه من شاب جدع لمراته بعد يوم تعبت فيه ، الوطن موده ورحمه بين زوجين ، الوطن ولد جدع بيعدى ست عجوزه الشارع مش عارفه تعدى وماسك أيديها وخايف عليها كأنها امه ، الوطن لمه حلوه وضحكه حلوه ونكته حلوه وأكله حلوه وكوباية شاى ، الوطن اما بناتنا ترقص على أغنية منير واحنا وراهم بنصقف بنقول الله ، الوطن امى وأمك بتدعي لك فى الفجرية ، الوطن عسكرى واقف شايل سلاحه بيحمى ارضك وعرضك ويبصون تراب بلدك فى عز البرد ، الوطن عامل عرقان فى مصنع ومهندس بيطبطب على ضهره يديله امل فى بكره ، الوطن ضابط شهيد مافكرش لحظة قبل مايقدم روحه لبلده ، الوطن ولد صغير حاضن اخته فى الشارع بيحميها ، الوطن يعنى ولاد بلدى الجدعان وستاتها اللى بمليون راجل ، الوطن طبيب رحيم بيعالج لوجه الله ،  الوطن فنجان قهوه ريحته ريحة بلدى ، الوطن وانت ماشى على الكورنيش وبتشوف جمال نيل بلدك وبتاكل دره مشوى ، الوطن زكريات حلوه ومره عيشناها انا وانت وكل المصريين ، الوطن فى قلبى وفى قلبك وفى قلوب كل المصريين  ، الوطن ومصر بتلعب ماتش كوره او جندى شهيد فى قلب سينا وقلوبنا كلها تهتز ، الوطن يعنى حلمى وحلمك فى بكرة احلى ، الوطن وانت بتدعّى لمصر وجنودها ان ربنا ينصرهم وتزعل لو عرفت ان واحد فيهم مات كأنه ابنك  ، الوطن يعنى علم بلادى يترفع ويرفرف وفيه روح مصر ، الوطن يعنى انا وانت وابنى وابنك وبنتك وبنتى ، الوطن يعنى الامل والنور والدفا والحنان ، الوطن يعنى الحياة ، الوطن يعنى #مصر

واشوفكم فى مواضيع تانية ان شاء الله هنتكلم فيها كتير عن مصر عن الوطن .