د. ماهر حبيب يكتب:يا عزيزى كلنا متعصبين

 

فالمسلم شديد التعصب لدينه ولا يقبل الآخر وكذلك المسيحى بنفس الدرجة والشدة أما اللاديني فلا يطيق  لا هذا ولا ذاك

 

والاهلاوى لا يطيق الزملكاوي ويتمنى أن يخسر كل مبارياته  الدولية والمحلية و اللى فى القلب فى القلب مهما عملوا افلام عربية و اجنبية وغنوا المصريين اهما لكن لو كشفت الحقيقة حا تلاقى الزمالكاوى بيدعى في سره بأن الترجى يفوز و فريق موزمبيق يقطع الاهلى لكن فى العلن بيغنى انا المصري كريم العنصري

 

ولو كنت إخوان فأنت كاره الدنيا كلها وتختصرهم فى جماعته

 

ولو كنت ناصرى فكل من لا يؤمن بناصر هو خائن وعميل

 

ولو بتحب السادات فكل الناصريين محتاجين مصحة عقلية

 

ولو بتحب مبارك فأنت شايفه البطل الذى لا يشق له غبار

 

 

أما لو بتكره مبارك فهو مسؤول عن موجة الحرارة وعن الست اللى قتلت جوزها فى موزمبيق ده غير دخل قناة السويس يتورد له لغاية النهاردة فى شوال بيجيبه ليه الراجل إللى بيلم الكارتة بتاعت القناة بيلم الدولارات ويحطها فى كيس زبالة اسود ويديها لمبارك والاسترليني يديه لسوزان علشان الجنسية البريطانية

و كلنا كلنا مش طايقن بعضنا رجالة ستات شباب كبار مقطعين هدوم بعض ومش واخدين بالنا أن مصر واقفة جنبنا تتفرج على ولادها وصعبان عليها منهم وناسيين انهم ولاد بلد واحدة ولما خلفتهم ما فرقتش بينهم و خلت واحد مصرى والتانى مصرى بشرطة أو شرطيين يا مصريين… فيا عزيزى كلنا فى الهم شرق وكلنا طلعنا متعصبين