د.ماهر حبيب يكتب:تمام يا سعادة الباشا

ترررن ترررن
 
الوزير: ألو
 
المتحدث : ألو
 
الوزير : فيه أيه علشان تصحينى فى نص الليل
 
المتحدث: يا باشا الصندل غرق فى النيل
 
الوزير : بقى بتصحينى علشان تقول واحد صندله غرق طب مال ده ومال البيئة
 
المتحدث: يا سعادة الوزير فيه صندل غرق فى الصعيد وكان عليه 500 طن فوسفات
 
الوزير: طب وأنا مالى كلم وزير النقل كلم وزير الداخلية كلم وزير الرى لكن ما تصحينيش من النوم على خبر تافه زى ده
 
المتحدث : يا سعادة الباشا دول 500 طن فوسفات والدنيا مقلوبة وبيقول لك الناس حا تبطل تشرب ميه النيل
 
الوزير : يا راجل دول المصريين معدتهم تهضم الظلط يقوم حا يبطلوا يشربوا ميه علشان الفوسفات ما المصانع بترمى فى النيل زيبق ورصاص وكل البلاوى الزرقا جت ع الفوسفات
 
المتحدث : أيوه بس الميديا عامله قلق
 
الوزير : أدى إللى خدناه من التكنولوجيا والنت دوشة ووجع دماغ زمان ما كانش فيه الإزعاج ده يا بخت الوزرا بتوع زمان
 
المتحدث: طب نتصرف إزاى يا سعادة الوزير
 
الوزير : أولا أنا مش لازم أظهر فى الصورة… الأول بتوع محطات الميا يطلعوا يقولوا إحنا بقالنا 3 أيام بنعمل تحاليل وثبت إنها سليمة مليون فى المية
 
المتحدث : يا باشا الحادثة حصلت من كام ساعة إزاى حا يطلعوا يقولوا بقالهم 3 أيام
 
الوزير : خلاص رئيس مصلحة المية يطلع الصبح يقول إنهم باتوا الليل كله يحللوا وطلع مفيش تلوث
 
المتحدث: بس ده ما حصلش لسه
 
الوزير : إنت كمان حا تكدبنى لما أقول حصل يبقى حصل وبعدين تجيبوا كام موظف من عندنا فى الوزارة وكلهم يجيبوا أحلى بدلة عندهم وتنطوروهم فى القنوات الفضائية ده خبير فى البيئة يروح عند لميس وواحد تانى خبير فوسفات يروح لأحمد موسى وواحد خبير تحاليل عند تاتنت أمانى وواحد عند الإبراشى يكون مسشور شعره وبعدين بعد ما يطلعوا فى البرامج كل واحد يروح على قناة تانية وتالتة وبعدين يروحوا متصلين بكل القنوات عن طريق التليفون المهم مفيش ولا قناة تبات إلا إذا كانت ذاعت عشر مقابلات على الأقل علشان مصر كلها تبات وفى بطنها بطيخة صيفى
 
المتحدث : طب وحا يقولوا أيه طبعا حا يقولوا الحقيقة
 
الوزير: إنت إتجننت يطلعوا يقولوا قصايد شعر فى الفوسفات وفوايده على السمك إللى حا يخليهم ينوروا وإن الفوسفات مش بيدوب وأول ما بيلمس المية بيتحول إلى صخور جرانيت لا يغيرها الزمان وبعدين بعد الناس ما تطمئن خالص حا أطلع بقى الطلعة الكبيرة بتاعتى وأقول للناس إن الخيار مفيد للجبنة قصدى إن فى دول أمريكا اللاتينية بيدوبوا الفوسفات فى المية علشان كده تلاقى الستات فى المسلسلات المكسيكية بتنور الشاشة وبكده كله يبقى فى السليم
 
المتحدث : مية مية يا سعادة الباشا أى أوامر تانية
 
الوزير : عدى على كارفور وهاتى من هناك كل المية المعدنية الموجودة هناك وهات عربية نقل كبيرة وتجيب القزايز بكل الأنواع وإنت جايب الحاجات دى أبقى إقفل محبس المية العمومى بتاعى علشان أنا من هنا ورايح مش حا أستعمل الحنفية خالص وحا نبقى نعبى الخزان إللى فوق بالمية المعدنية أصل العمر مش بعزقة
 
المتحدث : تماما يا سعادة الباشا