د.ماهر حبيبب يكتب:عادى

وعادى برضه إنه يخرج علينا متحدثين من وزارة الصحة مهللين و مبشرين أن المية 100% سليمة ومفيش خطر
وعادى قوى تغرق كل الكمية دى وتبقى فص ملح وداب ولا نحاول نطلع من المية ربع كيلو فوسفات مع إن البهوات بيقول لك إنه ما بيدوبش فى المية وهذا صحيح لكنك ممكن تجيب كراكات وتنزح الفوسفات الراقد فى قاع النيل وبدل ما يبقى فيه 500 طن فى الميه أهو يبقوا 499 طن ويبقى نص العمى والا العمى كله

وعادى إننا نطمن الناس ويطلع حاملى المباخر والمطبلاتية بعد يوم واحد من كارثة هذا حجمها ويقول لك عملنا تحاليل والنيل زى الفل وإننا بنطلع إشاعات وبننشر أخبار كاذبة وإننا إخوان والدنيا ربيع والجو بديع قفلى على كل المواضيع

وعادى خالص إن بعد يوم والا إتنين ننسى الموضوع ويا دار ما دخلك شر وننشر معلومة إن المصريين معدتهم بتهضم الحديد مش حا تعرف تهضم 500 طن فوسفات ده حتى يبقى إستهانة بقدرات المصريين الخارقة
وعادى جدا إننا ما ندورش على إللى عمل الحادثة ونحاسب من عملها ومن إنتظر حتى غرقت السفينة بالكامل فى قاع النيل و علقة تفوت ولا حد يموت

وعادى جدا إن رئيس الوزارة ما يطلعش يقول بيان يكشف الحقيقة العارية وينبه الناس من الأخطار التى حصلت وينبه على الناس الإمتناع عن تناول الأسماك فى المناطق المجاورة للحادثة 

عادى خالص يا مصريين الحادثة دى زى شكة الدبوس وأنتو شعب جبار حا تستحملوا 500 طن فوسفات وحتى لو 500 طن سيانيد مش حا يأثر فى الشعب إللى خرم التعريفة وحكومته دهنت الهوا دوكو مخلوط بالفوسفات
عادى عادى عادى و بلاش تفكروا علشان ما يجيلكمش الهم و قولوا يا باسط وإحنا عندنا رئيس وزارة طيب ونيتة صافية وإللى قلبه أبيض دايما منصور وأيه يعنى 500 طن فوسفات يعنى حا يكون نصيب كل فرد منكم 5 كيلو فوسفات تاكلوهم تشربوهم تسلكوا بيها سنانكم مفيش مشكلة خالص مادام بتوع وزارة الصحة بيقولوا لكم عادى مشيها عادى لغاية ما تحصل الكارثة ويبان أثر تسمم الفوسفات ساعتها يكون محلب خرج من الوزارة بقاله عشرين سنة وإبقوا قابلونى لو حد حاول يستنجد بالعالم المتحضر لنجدة مصر من كارثة الفوسفات فنحن نؤمن بمقولة دارى على فوسفاتك يدوب والفهلوة كنز لا يفنى